Et ait ou mal fort et puissant courage

Trop sont divers et merveilleux les tours De l’inconstant, double et faulsse Fortune ; Car ses maux sont moult loncs, et ses biens cours ; Nous le voyons, et c’est chose commune, Dont je ne vois pourveance fors qu’une Contre elle ; c’est que l’omme soit si saige Qu’il n’ait des biens d’elle liesse aucune, Et ait ou mal fort et puissant courage. Veoir pouons que tout vient a rebours Souvent aux bons par sa fellasse enfrune, Et aux mauvais, sans desserte ou labours, Rent bon guerdon, mais de deux voyes l’une : Ou réconfort ou lenguir en rencune ; Prendre conseil convient si qu’homs se targe De bon espoir, quoi qu’elle lui soit brune, Et ait ou mal fort et puissant courage. Car puis que ses joies ne font qu’un cours Par le monde general en commune Que nous veons plus souvent en decours Sus les greigneurs rneismes que n’est la lune, Homme ne doit les prisier une prune, Mais, s’ilz viennent, pensser qu’en petit d’âge Perdre on les puet, seurté n’y ait aucune, Et ait ou mal fort et puissant courage. Princes, soyez certains qu’oncques ne fu ne Ja ne sera Fortune fors voulaige ; En soit chacun avisié et chacune, Et ait ou mal fort et puissant courage.