Sire, de si tôt vous amer

Il vous est bien pris en sursault Le mal d’amours qui si vous blesse ; Ne voulez pas avoir deffault Pour avoir de prier paresce. Je ne suis pas d’amer maîtresse, Et nyce on me devroit clamer, Sire, de si tôt vous amer. Car il m’est vis que dame fault Contre honneur et contre noblesse, De tôt donner ce que tant vault, Qu’il n’est nulle plus grant richece Aux desirans, ne tel leesce. On vous lairoit pou affamer, Sire, de si tôt vous amer. Et desservir avant vous fault Les biens d’amours a grant destrece, Et souffrir le froid et le chault, Que vous en ayez tel largece ; Bien me tendriez a musarresse, Vous meismes me devriez blâmer, Sire, de si tôt vous amer.