Ballade X (À ma Dame je ne sais que je dye)

À ma Dame je ne sais que je dye, Ne par quel bout je doive commencer, Pour vous mander la doloreuse vie Qu’Amour me fait chacun jour endurer. Trop mieulx vaulsist me taire que parler, Car proufiter ne me pevent mes plains, Ne je ne puis guerison recouvrer, Puisqu’ainsi est que de vous suis loingtains. Quanque je vois me desplaist et ennuye, Et n’en ose contenance montrer, Mais ma bouche fait semblant qu’elle rie, Quant maintefois je sens mon cueur plourer. Au fort, martir on me devra nommer, Se Dieu d’Amours fait nulz amoureux Saints, Car j’ai des maux plus que ne sais compter, Puisqu’ainsi est que de vous suis loingtains. Et non pourtant, humblement vous mercie, Car par escript vous a pleu me donner Ung doux confort que j’ai à chère lie Receu de cueur et de joyeux penser, Vous suppliant que ne veuillez changier, Car en vous sont tous mes plaisirs mondains Desquelz me fault à présent deporter, Puisqu’ainsi est que de vous suis loingtains.