Ballade XIX (Je n’ai plus soif, tairie est la fontaine)

Je n’ai plus soif, tairie est la fontaine ; Bien eschauffé, sans le feu amoureux ; Je vois bien clair, jà ne fault qu’on me maine ; Folie et Sens me gouvernent tous deux ; En Nonchaloir resveille sommeilleux ; C’est de mon fait une chose meslée, Ne bien, ne mal, d’aventure menée. Je gaingne et pars, mescontant par semaine ; Ris, Jeux, Deduiz, je ne tiens compte d’eulx ; Espoir et Deuil me mettent hors d’alaine ; Eur, me flatent, si m’est trop rigoreux ; Dont vient cela que je riz et me deulz ? Esse par sens, ou folie esprouvée ? Ne bien, ne mal, d’aventure menée ? Guerdonné suis de malheureuse estraine ; En combattant, je me rends couraigeux. Joie et Soussy m’ont miz en leur demaine ; Tout desconfit, me tiens au ranc des preux ; Qui me saroit desnoer tous ses neux ? Tête d’acier y fauldroit fort armée, Ne bien, ne mal, d’aventure menée. Vieillesse fait me jouera tels jeux, Perdre et gaingner, et tout par ses conseulx ; À la faille j’ai joué cette année. Ne bien, ne mal, d’aventure menée.