Ballade XV (Or ça, puisque il faut que responde)

Or ça, puisque il faut que responde, Moi, Fortune, je parleray : Si grant n’est, ne puissant ou monde, À qui bien parler n’ozeray. J’ai fait, faits encore, et ferai Ainsi que bon me semblera De ceux qui sont soubz ma puissance ; Parle qui parler en voudra. Je n’en ferai qu’à ma plaisance. Quant les biens, qui sont en la ronde, Sont miens, et je les donneray Par grant largesse, dont j’abonde, Et après je les reprendray, Certes, à nul tort ne ferai. Qui esse qui m’en blasmera ? Je l’ai ainsi d’acoustumance. En gré le preigne qui pourra, Je n’en ferai qu’à ma plaisance. En raison jamais ne me fonde, Mais mon vouloir accompliray ; Les aucuns convient que confonde, Et les autres avanceray ; Mon propos souvent changeray, En plusieurs lieux, puis çà, puis là, Sans regle ne sans ordonnance. Où est il qui m’en gardera ? Je n’en ferai qu’à ma plaisance. On escript : Tant qu’il nous plaira, Ès lettres des seigneurs de France ; Pareillement de moi sera, Je n’en ferai qu’à ma plaisance.