Ballade XXXII

Belle, s’il vous plaît escouter Comment j’ai gardé en chierté Votre cueur qu’il vous pleut laissier Avec moi, par votre bonté, Sachiés qu’il est enveloppé En ung cueuvrechief de Plaisance, Et enclos, pour plus grant seurté, Ou coffre de ma souvenance. Et pour nettement le garder, Je l’ai souventesfois lavé En lermes de Piteux Penser ; Et regrettant votre beauté, Après ce, sans delay porté, Pour sechier, au fou d’Espérance, Et puis doucement rebouté Ou coffre de ma souvenance. Pource, veuillez vous acquitter De mon cueur que je vous ai donné, Humblement vous en vueil prier, En le gardant en loyauté, Soubz clef de Bonne Volonté, Comme j’ai fait, de ma puissance, Le votre que tiens enfermé Ou coffre de ma souvenance. Ma Dame, je vous ai compté De votre cueur la gouvernance, Comment il est et a été Ou coffre de ma souvenance.