Ballade LXV

Plaisant Beauté mon cueur nasvra, Jà pieçà, si tresdurement Qu’en la fièvre d’Amours entra, Qui l’a tenu moult asprement ; Mais, de nouvel, presentement, Ung bon médecin qu’on appelle Non Chaloir, que tiens pour ami. M’a guery, la sienne merci, Se la plaie ne renouvelle. Quant mon cueur tout sain se trouva, Il l’en mercia grandement Et humblement lui demanda S’en santé serait longuement ? Il respondy tressagement : « Mais que gardes bien ta fourcelle Du vent d’Amours qui te fery, Tu es en bon point jusqu’à cy, Se la plaie ne renouvelle. L’embusche de Plaisir entra Parmi tes yeux soutivement ; Jeunesse le mal pourchassa, Qui t’avait en gouvernement Et puis bouta privéement Dedans ton logis l’étincelle D’Ardant Désir qui tout ardy ; Lors fus nasvré, or t’ai guery, Se la plaie ne renouvelle.