Ballade LXVI

Le beau souleil, le jour saint Valentin Qui apportoit sa chandelle alumée, N’a pas long temps, entra un bien matin Privéement en ma chambre fermée. Celle clarté, qu’il avait apportée. Si m’esveilla du somme de Soussy Où j’avais toute la nuit dormy Sur le dur lit d’Ennuieuse Pensée. Ce jour aussi, pour partir leur butin Des biens d’Amours, faisoient assemblée Tous les oyseaulx, qui parlans leur latin, Crioyent fort, demandans la livrée Que Nature leur avait ordonnée. C’était d’un per, conime chacun choisi Si ne me peu rendormir, pour leur cry, Sur le dur lit d’Ennuieuse Pensée. Lors en moillant de larmes mon coessin, Je regrettay ma dure destinée. Disant : Oyseaulx je vous vois en chemin De tout plaisir et joie désirée ; Chacun de vous a per qui lui agrée, Et point n’en ai, car Mort, qui m’a trahy, A prins mon per, dont en deuil je languy Sur le dur lit d’Ennuieuse Pensée. Saint Valentin choisissent cette année Ceux et celles de l’amoureux party ; Seul me tendray, de Confort desgarny, Sur le dur lit d’Ennuieuse Pensée.