Dieux nous y maint trestous a la parclose !

Si comme il est raison que chacun croie En un seul Dieu, sans faire aucune doubte, Qui aux esleus son paradis ottroie Et les pervers laidement en deboute, Est il a tous neccessaire De parvenir au souverain repaire A la parfin, ou toute riens repose. Dieux nous y maint trestous a la parclose ! Et non obstant qu’en peschié se desvoye Tout cuer humain, et que le monde boute En maint meffais, si doit on toutevoie Soi retourner vers Dieu ; car une goutte De larme fait a Dieu plaire Le repentant, tant est trés debonnaire ; Si est rescript en la divine prose. Dieux nous y maint trestous a la parclose ! Si devons, tous et toutes, querir voie De parvenir avec la noble route Des benois sains, ou vit et règne a joie Le trés haut Dieu, en qui est bonté toute, Qui nous donra tel salaire, Se nous voulons repentir et bien faire, Ou joie et paix et grant gloire est enclose. Dieux nous y maint trestous a la parclose !