Que ses joies ne sont fors que droit vent
Christine de Pizan
Cent Ballades
Qui trop se fie es grands biens de Fortune,
En verité, il en est deceü ;
Car inconstant elle est plus que la lune.
Maint des plus grands s’en sont aperceü,
De ceux meismes qu’elle a haut acreü,
Trebusche tôt, et ce voit on souvent
Que ses joies ne sont fors que droit vent.
Qui vit, il voit que c’est chose commune
Que nul, tant soit perfait ne esleü,
N’est espargné quant Fortune repugne
Contre son bien, c’est son droit et deü
De retoulir le bien qu’on a eü,
Vent chierement, ce sait fol et sçavent
Que ses joies ne sont fors que droit vent.
De sa guise qui n’est pas a touz une
Bien puis parler ; car je l’ai bien sceü,
Las moi dolens ! car la fausse et enfrune
M’a a ce cop trop durement neü,
Car tollu m’a ce dont Dieu pourveü
M’avait, hélas ! bien vois apercevent
Que ses joies ne sont fors que droit vent.