S’il n’a bonté, trestout ne vaut pas maille

Bien nobles est qui en soi a bonté, Il n’est trésor qui a tel valeur monte, Et en haut pris bien doit être monté Cil qui est bon ; et aussi toute honte Doit bien le mauvais avoir ; Pour tant, s’il a grant puissance ou avoir, Ou que si bel soit que riens ne lui faille, S’il n’a bonté, trestout ne vaut pas maille. Et quant les fais des bons sont raconté, On s’esjouït partout ou l’en les conte ; Et que des bons mauvais soient donté A chacun plaît, et par nombre on les conte Les bons pour ramentevoir. Chacun voudrait, plus qu’il ne fait, valoir ; Car il n’est nul, tant sa richece vaille, S’il n’a bonté, trestout ne vaut pas maille. Plus nobles est et plus est ahonté, Soit prince ou roi, duc, chevalier ou conte, Se en valeur les autres surmonté N’a et en bien. Gentillece que monte Se mieulx ne se fait valoir Qu’autres ne font ? Il est bon assavoir Qu’il n’est nulz homs, de quelque lieu qu’il saille, S’il n’a bonté, trestout ne vaut pas maille.