Ballade XX (Pourquoi m’as tu vendu, Jeunesse)

Pourquoi m’as tu vendu, Jeunesse, À grant marchié, comme pour rien, Ès mains de ma Dame Vieillesse Qui ne me fait gueres de bien ? À elle peu tenu me tien, Mais il convient que je l’endure, Puis que c’est le cours de nature. Son hostel, de noir de Tristesse Est tondu ; quant dedans je viens, G’y vois l’istoire de Destresse Qui me fait changer mon maintien Quant la ly, et maint mal soustien ; Espargnée n’est créature, Puis que c’est le cours de nature. Prenant en gré cette rudesse, Le mal d’aultruy compare au mien ; Lors me tance Dame Sagesse, Adoncques en moi je revien, Et crois de tout le conseil sien Qui est en ce plain de droiture, Puis que c’est le cours de nature. Dire ne saroye combien Dedans mon cueur mal je retien, Serré d’une vieille sainture, Puis que c’est le cours de nature.