Selon seigneur voit on maignée duite

Gentiellece qui les vaillants cœurs duit De courtoisie fait sa messagiere Qui ses rapors trés gracieux conduit Et toute gent reçoit a lie chère ; Si voit on bien resplendir sa lumière En une court de France solennée, De prince haut tellement gouvernée Que personne n’y a qui toute adulte Ne soit d’honneur, dont, chose est certenée, Selon seigneur voit on maignée duite. Le trés haut duc filz de roi, qui est vuit De tout orgueil et qui sagece a chère, Philippe bon des Bourgoignons réduit Et les Flamens touz a soubz sa baniere, En est le chief, en qui prudence entière Maint, si qu’il n’a o lui personne née, Qui en touz cas ne soit si ordonnée Qu’on peut dire de sa trés plaisant suite, Tant noblement est et bien dottrinée, Selon seigneur voit on maignée duite. Bel fait veoir celle court qui reluit De nobles gens en fait et en manière Si beaux, si gens, si courtois, que deduit Est du veoir, et sans manière fière, Si gracieux que c’est joie plainiere ; Et aux armes nulz meilleurs de l’année On ne verra en champ ne a journée, Mais, s’ilz sont bons et hardis et sans fuitte, C’est bien raison par coustume affermée Selon seigneur voit on maignée duitc. Prince excellent, se bien moriginée Est votre court par noblesse conduitte, Le proverbe dit, c’est chose infourmée ; Selon seigneur voit on maignée duite.