Ballade XVII (L’autre jour tenait son conseil)

L’autre jour tenait son conseil, En la chambre de ma pensée. Mon cueur qui faisait appareil De deffence contre l’armée De Fortune mal advisée Qui guerryer voulait Espoir, Se sagement n’est reboutée, Par bon Eur et Loyal Vouloir. Il n’est chose soubz le souleil Qui tant doit être desirée Que Paix ; c’est le don non pareil Dont Grace fait toujours livrée À sa gent qu’a recommandée ; Fol est qui ne la veut avoir, Quant elle est offerte et donnée Par Bon Eur et Loyal Vouloir. Pour Dieu, laissons dormir Traveil ; Ce monde n’a gueres durée, Et Paine, tant qu’elle a sommeil, Souffrons que prengne reposée. Qui une foiz l’a esprouvée La doit fuir, de son povoir, Par tout doit être deboutée, Par Bon Eur et Loyal Vouloir. Dieu nous doint bonne destinée, Et chacun face son devoir, Ainsi ne sera redoutée Par Bon Eur et Loyal Vouloir.