Jusques a tant que je le reverray

Se j’ai le cuer dolent je n’en puis mais, Car mon ami s’en vait en Angleterre, Ne je ne sais quant le reverray mais Le bel et bon qui mon cuer tient en serre ; Car entre lui et moi ara grant barre ; Mais jamais jour joie ne bien n’aurai, Jusques a tant que je le reverray. Et quant je pense a ses gracieux fais Doulz et plaisants, trop fort le cuer me serre ; Et comment pour mourir, certes, jamais Ne me courçast, et ou pourroye querre Nul plus plaisant ? or vueil je Dieu requerre Qu’il le convoit ; mais dolente seray, Jusques a tant que je le reverray. Or est mon cuer chargié de pesant fais, Dont plains et pleurs me feront dure guerre ; Et en lui seul seront tous mes regrais ; Car je l’aime plus que riens qui soit sus terre. Si convendra que le renvoye querre, Ou a douleur et meschief languiray, Jusques a tant que je le reverray.