Ce plaisant jour premier de l’an nouvel

Bon jour, bon an, bon mois, bonne novelle, Ce premier jour de la présent année Vous envoit Dieux, ma chère damoiselle De Monpensier, si soies estrenée De toute joie. A vo souhaid Dieux pri qu’il vous envoie Tous vos plaisirs, tout gracieux revel, Quanque vouldriez vous consente et ottroie Ce plaisant jour premier de l’an nouvel. Et ma trés chère et redoutée, et celle Que je désir autant com dame née Servir, louer, et que chacun appelle De grant bonté et beaulté affinée, En plaisant joie Vo noble cuer Dieux permaine et convoie Ou jolis temps dont vient le renouvel, Et a présent a tout bien vous avoie Ce plaisant jour premier de l’an nouvel. Noble, plaisant, trés gracieuse et belle. Bonne, vaillant, sage, bien aournée, Prenez en gré ma ballade nouvelle Que j’ai faitte pour vous cette journée, Car ou que soie Votre je suis et obeïr vouldroie, Amer, chérir vo gracieux corps bel. Si vous doint Dieux quanque pour moi voldroie Ce plaisant jour premier de l’an nouvel. Du petit don, pour Dieu, ne vous anoie, Car bon vouloir mieulx que fermail n’anel Vaut moult souvent ; volontiers plus feroie Ce plaisant jour premier de l’an nouvel.