De haut honneur et de chevalerie

Prince honnoré, duc d’Orliens, louable, Bien vous devez en haut penser déduire Et louer Dieu et sa grace amiable Qui si vous veut en tout honneur conduire Que le renom par le monde fait luire De votre court remplie de noblesse Qui resplendit comme chose florie En noble ioz, et adès est radrece De haut honneur et de chevalerie. Or ont acreu le loz li sept notable Bon chevalier que vaillance a fait duire Si qu’a grant loz et victoire honnorable Ont desconfit les sept Anglois, qui nuire Aux bons François cuident et les destruire ; Mais le seigneur du Chastel, ou proece Fait son réduit et la bachelerie, Bataille, ont mis Anglois hors l’adresse De haut honneur et de chevalerie. Et Kerhoïs le breton secourable Qui mains grands biens fera ainçois qu’il meure, Et Barbasan et Champaigne amiable, Et Archambaut qui fait son renom bruire, Le bon Clignet de Breban qui aduire En armes veut son corps et sa jeunece ; Par ces sept bons est la gloire perie De nos nuisans qui perdent la haultece De haut honneur et de chevalerie, Prince puissant, honnourez a liesse Les bons vaillants ou valeur n’est perie. Car vous arez par eux toute largece De haut honneur et de chevalerie.