En ce jolis plaisant doulz mois de May

Or soiez liez, joyeux ; et envoisiez ; Tous amoureuz, puis que May est venu. De tous vos deulz ores vous aquoisiez ; Chantez, jouez trestuit, grant et menu, Et querez voye De joie avoir, et chacun se pourvoye De réconfort et entroublie esmay ; Car Amours veut qu’un chacun se cointoye En ce jolis plaisant doulz mois de May. Voyez ces champs et ces arbres proisiez, Et ces beaulx prés qui sont vers devenu, Ces oisillons qui tant sont renvoisiez Que par eulz est tout doux glay maintenu, Or menez joie, Et vous dames aussi, Amours l’octroye, Soyez liez ; car s’oncques je n’amay Si vueil je amer chose qui me resjoye En ce jolis plaisant doulz mois de May. Chapiaux de fiours aux amans pourchaciez, Dames d’onnour, et s’avez retenu Aucun ami tant de bien lui faciez Que du douiz May lui soit mieux avenu ; Mais toutevoye N’octroyez rien dont blâmer on vous doye, Se m’en croyez, mais oncques ne blasmay Que l’en n’amast par gracieuse voye En ce jolis plaisant doulz mois de May. Dames, amans, chacun de vous s’avoye De liement aller cueillir le may Ce Joli jour, et tout annuy renoye En ce jolis plaisant doulz mois de May.