Ce jour de l’an vous soiez étrenné

De tous honneurs et de toutes querelles, De tout boneur et de bonne aventure. De tous plaisirs, de toutes choses belles, Et de celui qui creé a nature. De quanque ou ciel et en terre a mesure, Et de tout ce plus propre a homme né, Mon redoubté seigneur plein de droiture, Ce jour de l’an vous soiez étrenné. Trés noble duc d’Orliens, de nouvelles A vo souhaid et d’amour vraie et pure, De ris, de jeux et de notes nouvelles Resjouÿssanz, d’union sans murmure Et de tout ce de quoi tous bons ont cure, De tout le bien qu’en corps bien ordenné Il doit avoir, de paix qui toujours dure Ce jour de Pan vous soiez étrenné. De tous nobles, de dames, de pucelles Et de chacun par communal jointure Aimé soiez, et de ceux et de celles Qu’oient parler, de bouche ou escripture. De vous, prince de roiale faitture, De leur salut loyaux en tout régné Et de leur loz sans fausse couverture Ce jour de l’an vous soiez étrenné. Prince excellent ou il n’a desmesure, De ce livret qu’ai fait mal ordené, De par moi, vo trés humble créature, Ce jour de l’an vous soiez étrenné.