Pour le grant bien qui en vous maint

Pour le grant bien qui en vous maint, Bel et bon, ou mon cuer remaint, Je vueil vivre joyeusement, Car vous me donnez sentement De très grands plaisirs avoir maint. Car quant j’oy dire que l’en tient Que votre gent corps se contient, Si haultement, en toute honnour, Que grâce et loz vous apanient Sur tous autres, bien le retient Mon cuer qui ne pourrait grigneur Joie avoir, et quant il attaint A votre amour qui l’a attaint. C’est moult grant resjouïssement Et pour ce vit très liement Mon cuer qui d’amer ne se faint Pour le grant bien qui en vous maint. Et quant je pense et me souvient Du très grant plaisir qui me vient De vous, amis, de tous la flour, J’ai tel joie, souvent advient, Que ne scay que mon cuer devient, Tant suis prise de grant doulçour. En ce penser giette un doulz plaint Mon cuer, qui a vous se complaint, Quant vous êtes trop longuement Sans moi veoir ; car seulement L’amour de vous le mien cuei vaint, Pour le grant bien qui en vous maint.