Ce jour de l’an, ma redoutée dame

Haute, excellent Roÿne couronnée De France, trés redoutée princece, Dame puissant et de bonne heure née, A qui honneur et vaillance s’adresse, Des princeces souveraine maîtresse, Je pri cil Dieu, qui ne fault a nulle ame, Qu’il vous envoit de toute joie adresse, Ce jour de l’an, ma redoutée dame. Boneur, bon temps, trés agréable année, Vrai réconfort de ce que plus vous blesse, Plaisir, soulas, vous doint cette Journée Et les autres plus en plus vous eslece. Toudis accroisse et garde vo haultece, Votre valeur et vo trés noble faame, Et vous envoit Joie qui ja ne cesse, Ce jour de l’an, ma redoutée dame. Mais je suppli, haute bien ordennée. Ma excellent redoutée, ou humblece Fait son manoir, que merci soit donnée A moi se je mesprens par ma simplece D’écrire a vous, ou tant a de noblesse ; Digne n’en suis, si n’en aie nul blasme, Car grant désir de vous servir m’i drece, Ce jour de l’an, ma redoutée dame. Ma ballade pregne en gré vo sagece, Si suis votre creature par m’ame Qui volentiers vous donroie liesse, Ce jour de l’an, ma redoutée dame.