Je m’en raport a tous sages ditteurs

Aucunes gens porroient mesjugier Pour ce sur moi que je fais dits d’amours ; Et diroient que l’amoureux dongier, Je sais trop bien compter et tous les tours, Et que ja si vivement N’en parlasse, sans l’essay proprement. Mais, sauve soit la grace des diseurs, Je m’en raport a tous sages ditteurs. Car qui se veut de faire dits chargier Biaulz et plaisants, soient ou longs ou cours, Le sentement qui est le plus legier, Et qui mieulx plaît a tous de commun cours, C’est d’amours, ne autrement Ne seront fait ne bien ne doucement, Ou, se ce n’est, d’aucunes belles meurs, Je m’en raport a tous sages ditteurs. Qui pensé l’a, s’en veuille deschargier, Qu’en verité ailleurs sont mes labours. Pour m’excuser ne le dis ne purgier ; Car aimé ont assez de moi meillours, Mais d’amours je n’ai tourment Joie ne deuil ; mais pour esbatement En parlent maint qui ont ailleurs leurs cœurs, Je m’en raport a tous sages ditteurs.