Ballade LXVII

Mon cueur dormant en Non Chaloir, Resveilliez vous joyeusement, Je vous fais nouvelles savoir, Qui vous doit plaire grandement ; Il est vrai que presentement Une Dame treshonnorée En toute bonne renommée. Desire de vous acheter, Dont je suis joyeulx et d’accort ; Pour vous, son cueur me veut donner Sans departir, jusqu’à la mort Ce change dois je recevoir En grant gré, tresjoyeusement : Or, vous charge d’entier povoir Si chier et tant estroittement Que je puis, plus que loyaument Soit par vous cherie et aimée ; Et, en tous lieux, nuit et journée L’acompaigniez, sans la laissier, Tant que j’en aie bon rapport ; Il vous convient sien demourer, Sans departir, jusqu’à la mort. Alez vous logier ou manoir De son tresgracieux corps gent, Pour y demeurer main et soir, Et l’onnourer entièrement. Car, par son bon commandement, Lieutenant vous veut ordonner De son cueur, en joyeulx déport Pensés de bien vous gouverner, Sans departir, jusqu’à la mort.