Ballade VIII (Portant harnoys rouillé de Nonchaloir)

Portant harnoys rouillé de Nonchaloir, Sus monture foulée de Foibiesse, Mal abillé de Désireux Vouloir, On m’a croizé, aux montres de Liesse, Comme cassé des gaiges de Jeunesse ; Je ne congnois où je puisse servir ; L’arriereban a fait crier Vieillesse, Las ! fauldra il son soudard devenir ? Le bien que puis avecques elle avoir N’est que d’un peu d’atrempée sagesse ; En lieu de ce, me fauldra recevoir Ennui, Soussy, Desplaisir et Destresse ; Par Dieu ! Bon Temps, mal me tenez promesse, Vous me deviez contre elle soutenir, Et je vois bien qu’elle sera maîtresse, Las ! fauldra il son soudard devenir ? Foibles jambes porteront Bon Vouloir, Puis qu’ainsi est endurant en humblesse. Prenant confort d’un bien joyeulx espoir. Quant, Dieu merci, Maladie ne presse. Mais loing se tient, et mon corps point ne blesse ; C’est ung trésor que dois bien chier tenir, Vu que la fin de menasser ne cesse, Las ! fauldra il son soudard devenir ? Prince, je dis que c’est peu de richesse De ce monde ne de tout son plaisir : La mort depart ce qu’on tient à largesse, Las ! fauldra il son soudard devenir ?