Amours le veut et la saison le doit (Or sus, or sus, pensez de bien amer)

Or sus, or sus, pensez de bien amer, Vrais amoureux, et joie maintenir Ce mois de may, et vuidiez tout amer De vos doulz cœurs, ne lui veuillez tenir, Soiez joyeux et liez sans retenir Nul fel penser, car resjouïr se doit Tout vrai amant par plaisant souvenir ; Amours le veut et la saison le doit. Or y parra qui sçara reclamer Amours a droit pour a grant bien venir, Faire beaux dits, soi pour amours armer, Et ces beaux cops a jouste soutenir, Et le bon vueil sa dame retenir, Tôt obeïr, s’elle lui commandoit. C’est le devoir, qui bon veut devenir ; Amours le veut et la saison le doit. Si vous veuillez es doulz biens affermer Qui a tous bons doivent apertenir. Rire, jouer, chanter, nul ne blâmer, Et tristece toute de vous banir, Vestir de vert pour joie parfurnir, A fête aller se dame le mandoit, Vous tenir liez quoi qu’il doie avenir ; Amours le veut et la saison le doit. Vrais fins amans, pour a joie avenir Soiez jolis, car espérer on doit En ce doulz temps a tout bien parvenir ; Amours le veut et la saison le doit.