Quant cil est mort qui me tenait en vie

Hé ! Dieux, quel deuil, quel rage, quel meschief, Quel déconfort, quel dolente aventure, Pour moi, hélas, qui torment ai si grief, Qu’oncques plus grant ne souffri creature ! L’eure maudi que ma vie tant dure, Car d’autre riens nulle je n’ai envie Fors de mourir ; de plus vivre n’ai cure, Quant cil est mort qui me tenait en vie. O dure mort, or as tu trait a chief Touz mes bons jours, ce m’est chose molt dure, Quant m’as osté cil qui était le chief De tous mes biens et de ma nourriture, Dont si au bas m’as mis, je le te jure, Que j’ai désir que du corps soit ravie Ma doulante lasse ame trop obscure, Quant cil est mort qui me tenait en vie. Et se mes las dolens jours fussent brief, Au moins cessast la dolour que j’endure ; Mais non seront, ains toudis de rechief Vivray en deuil sans fin et sans mesure, En plains, en pleurs, en amère pointure. De touz assaulz dolens seray servie. D’ainsi mon temps user c’est bien droitture, Quant cil est mort qui me tenait en vie. Princes, voiez la trés crueuse injure Que mort me fait, dont fault que je devie ; Car choite suis en grant mesaventure, Quant cil est mort qui me tenait en vie.