Et qui n’aurait regrait a tel plaisance

Hélas ! par temps seront passez six moys Que je ne vy la riens que j’aime mieulx Qui sur tous est bel et bon a mon choix, Sage et courtois, mais loin est de mes yeulx Dont me venoit Joie et plaisir, c’est bien droit qu’il m’ennoit, Car tout le bien qui est en souffisance J’en avais, ce puis je tesmoigner. Et qui n’aurait regrait a tel plaisance Et a si trés douce amour eslongner ? Car avec ce qu’a trés bon le congnoiz, Tant de plaisirs me faisait en tous lieux De son pouvoir, que pas seule une foiz Je n’y trouvay faute, et, ce m’aist Dieux, Tant s’en penoit Que d’autre riens, crois, ne lui souvenoit. Il me servoit tout a mon ordonnance, De riens qu’il peust ne me fallait songner. Et qui n’aurait regrait a tel plaisance Et a si trés douce amour eslongner ? Dont a bon droit se j’en ai deuil et poiz Et se le lonc demour m’est ennuyeux, Car seulement d’ouïr sa douce voix Et me mirer en ses ris et gieux Tant me donnoit De liesse, que mon cuer y prenoit Deduit et paix, confort et soutenance, Car le veoye mien sans espargner ; Et qui n’aurait regrait a tel plaisance Et a si trés douce amour eslongner ? Princes, jugiez s’a tort la souvenance D’un tel ami me fait en pleurs baigner, Et qui n’aurait regrait a tel plaisance Et a si trés douce amour eslongner ?