Mon doux ami, d’autre ne me vient joye

Par ta valour et par ton maintien saige, Par ta douceur et trés plaisant manière. Et les grands biens et l’amoureux langaige Qui en toi sont, tu as m’amour entière En tout, en tout acquise en tel manière Que sans cesser je ne pensse autre part. Adès m’est vis que devant moi te voie. Ne nulle heure le mien cuer ne s’en part. Mon doux ami, d’autre ne me vient joye. Si as tant fait que mon cuer, qui sauvaige D’amours était, et qui ne faisait chère D’amer Jamais, ore est ou doux servage Du dieu d’amours, si qu’être ne puis fière N’a lui n’a toi, ains convient que plainiere- Ment me soye donnée sans départ A toi, amis, n’est rayson je doye Desobeïr au bien qu’il me départ. Mon doux ami, d’autre ne me vient joye, Et puis qu’Amours, par son haut seigneurage, Veut que tous deux soions soubz sa baniere, Or lui faisons de trés bon cuer hommage Sans départir, amis, en tel manière Que soies mien, et plus ne seray liere A ton doux vueil qui d’honneur ne se part. Aimes moi bien, car tu as l’amour moye, A toi me don, je te prends pour ma part. Mon doux ami, d’autre ne me vient joye. Fin cuer plaisant, or soions main et tart Loyaulx amans, quant a moi je l’ottroye, Plaisant désir le me conseille a part. Mon doux ami, d’autre ne me vient joye.