Ballade XXV (Priez pour paix, douce Vierge Marie)

Priez pour paix, douce Vierge Marie, Reine des cieulx, et du monde maîtresse, Faictes prier, par votre courtoisie, Saints et sainctes, et prenez votre adresse Vers votre fils, requerrant sa haultesse Qu’il lui plaise son peuple regarder Que de son sang a voulu racheter, En deboutant guerre qui tout dévoie ; De prières ne vous veuillez lasser. Priez pour paix, le vrai trésor de joie. Priez, prelaz et gens de saincte vie, Religieux, ne dormez en peresse, Priez, maistres et tous suivans clergie, Car par guerre fault que l’estude cesse ; Moustiers destruiz sont sans qu’on les redresse, Le service de Dieu vous fault laisser, Quant ne povez en repos demourer ; Priez si fort que briefment Dieu vous oye, L’Église voult à ce vous ordonner ; Priez pour paix, le vrai trésor de joie. Priez, princes qui avez seigneurie, Roys, ducs, contes, barons plains de noblesse, Gentilz hommes avec chevalerie, Car meschans gens surmontent gentillesse ; En leurs mains ont toute votre richesse, Debatz les font en haut estat monter. Vous le povez chacun jour veoir au cler, Et sont riches de vos biens et monnoye Dont vous deussiez le peuple supporter ; Priez pour paix, le vrai trésor de joie. Priez, peuple qui souffrez tirannie, Car vos seigneurs sont en telle foiblesse Qu’ilz ne pevent vous garder par maistrie, Ne vous aider en votre grant destresse ; Loyaux marchans, la selle si vous blesse Fort sur le dox, chacun vous vient presser Et ne povez marchandise mener, Car vous n’avez seur passage, ne voie, Et maint peril vous convient il passer ; Priez pour paix, le vrai trésor de joie. Priez, galans joyeux en compaignie, Qui despendre desirez à largesse, Guerre vous tient la bourse desgarnie ; Priez, amans, qui voulez en liesse Servir amours, car guerre, par rudesse, Vous destourbe de vos dames hanter, Qui maintesfoiz fait leurs vouloirs torner. Et quant tenez le bout de la courroye, Ung estrangier si le vous vient ôter ; Priez pour paix, le vrai trésor de joie. Dieu Tout Puissant nous veuille conforter Toutes choses en terre, ciel et mer, Priez vers lui que brief en tout pourvoye, En lui seul est de tous maux amender ; Priez pour paix, le vrai trésor de joie.