Ballade I (Mon cueur m’a fait commandement)

Mon cueur m’a fait commandement De venir vers votre jeunesse, Belle que j’aime loyaument, Comme dois faire ma Princesse. Se vous demandés pour quoi esse ? C’est pour savoir quant vous plaira Alegier sa dure destresse. Ma Dame, le sauray je jà ? Dittes le, par votre serment ; Je vous fais léale promesse Nul ne le saura, seulement Fors que lui, pour avoir léesse ; Or lui monstrés qu’êtes maîtresse, Et lui mandez qu’il guerira ; Ou s’il doit mourir de destresse, Ma Dame, le sauray je jà ? Penser ne pourrait nullement Que la douleur qui tant le blesse Ne vous desplaise aucunement ; Or faites donc tant qu’elle cesse, Et le remettés en l’adresse D’Espoir, dont il party pieçà ; Respondez sans que plus vous presse, Ma Dame, le sauray je jà ?