De bien en mieulx vous puist il avenir

Tout bon, tout bel, tout assouvi en grace, Lequel bon loz tesmoigne tout parfaiz, Duc de Bourbon, jeune, sage et qui passe, Selon l’âge, mains vaillants en tous fais, Vous soiez le trés bien venu Du haut voyage, ou êtes avenu A ce a quoi désir d’honneur vous chace. La merci Dieu, si en doit souvenir A tout homme qui vaillance pourchace. De bien en mieulx vous puist il avenir ! Mais de vos fais louez en toute place S’ilz sont vaillants et qu’en pouez vous mais ? Ce fait Amours, de qui vient toute grace, Qui vous y duit et repaist de ses maits ; Pour ce ne pourries être nu Des bons désirs et faits qu’ont maintenu Ceux qui suivent des trés meilleurs la trace, Qu’il prend et duit par plaisant souvenir ; De ce vous vient tout boneur a grant mace. De bien en mieulx vous puist il avenir ? Dont ne crois pas que celle qui enlace Vo gentil cuer en s’amour, quant le faits Du haut labour, qui nul temps ne vous lasse, Ot raconter, que se souffrist jamais De vous amer, quoi que tenu Vous soyez loin, maiz souvent et menu D’or en avant verrez sa douce face, Pour au plaisir honorable avenir Que dame peut donner sans que mefface. De bien en mieulx vous puist il avenir ! Prince gentil, en qui bonté s’amasse, En armes Dieux vous veuille maintenir Aussi d’amours qui jamais ne defface. De bien en mieulx vous puist il avenir !