Ballade XXX

Belle, bien avez souvenance, Comme certainement je crois, De la tresplaisant aliance Qu’Amour fit entre vous et moi ; Son secrétaire Bonne Foi Escrist la lectre du traictié, Et puis la scella Loyauté Qui la chose tesmoingnera. Quant temps et besoing en sera. Joyeux Désir fut en presence. Qui alors ne se tint pas coi, Mais mist le fait en ordonnance, De par Amour, le puissant roi ; Et, selon l’amoureuse loy. De nos deux vouloirs, pour seurté, Fit une seule volonté ; Bien m’en souvient et souvendra, Quant temps et besoing en sera. Mon cueur n’a en nully fiance De garder la lettre, qu’en soi ; Et certes ce m’est grant plaisance, Quant si tresloyal je le vois, Et lui conseille, comme dois, De toujours haïr Faulseté ; Car quiconque l’a en chierté. Amour chastier l’en fera, Quant temps et besoing en sera. Pensez en ce que j’ai compté, Ma Dame, car en vérité Mon cueur de foi vous requerra, Quant temps et besoing en sera.