Ballade XXXI

Venés vers moi, Bonne Nouvelle, Pour mon las cueur reconforter, Contez moi comment fait la belle, L’avez vous point oy parler De moi, et ami me nommer ? A elle point mis en oubli Ce qu’il lui pleut de m’acorder, Quant me donna le don d’ami ? Combien que Dangier, le rebelle, Me fait loing d’elle demourer. Je congnois tant de biens en elle Que je ne pourroye penser Que toujours ne veuille garder Ce que me promist sans nul si, Faisant nos deux mains assembler, Quant me donna le don d’ami. Pitié serait, se Dame telle, Qui doit tout honneur désirer, Failloit de tenir la querelle De bien et loyaument amer. Son sens lui sait bien remonstrer Toutes les choses que je dis Et ce qu’Amour nous fit jurer Quant me donna le don d’ami. Loyauté, veuillez asseurer Ma Dame que sien suis, ainsi Qu’elle me voulu commander. Quant me donna le don d’ami.