En ce printemps gracieux

En ce printemps gracieux D’être gai suis envieux, Tout a l’onnour De ma dame, qui vigour De ses doulz yeulz Me donne, dont par lesquielx Vifs en baudour. Toute riens fait son atour De mener joie a son tour, Bois et préz tieulx Sont, qu’ilz semblent de verdour Être vestus et de flour Et qui mieulx mieulx. Oysiaulx chantent en maint lieux ; Pour le temps délicieux Et plein d’odour Se mettent hors de tristour Joennes et vieux ; Tous meinent et ris et jeux Ou temps paschour, En ce printemps gracieux. Et moi n’ai je bien couleur D’être gai, quant la meilleur, Ainsi m’aist Dieux, Qui soit, je sers sans erreur, N’a autre je n’ai favour, Car soubz les cieulx N’a dame ou biens soient tieulx ; Si dois être curieux Pour sa valour D’elle servir sans sejour, Car anieux Ne pourrait être homs mortieulx De tel doulçour En ce printemps gracieux.