Je chante par couverture

Je chante par couverture, Mais mieulx plourassent mi oeil, Ne nul ne sait le traveil Que mon pouvre cuer endure. Pour ce muce ma doulour Qu’en nul je ne vois pitié, Plus a l’en cause de plour Mains treuve l’en d’amitié. Pour ce plainte ne murmure Ne fais de mon piteux dueil ; Ainçois ris quant pleurer vueil, Et sans rime et sans mesure Je chante par couverture. Petit porte de valeur De soi montrer dehaitié, Ne le tiennent qu’a folour Ceux qui ont le cuer haitié Si n’ai de demonstrer cure L’entencion de mon vueil, Ains, tout ainsi com je sueil, Pour celler ma peine obscure, Je chante par couverture.