Affaire eussions du bon duc de Bourgongne

Pleurez, Françoys, tout d’un commun vouloir, Grands et petits, pleurez cette grant perte ; Pleurez, bon Roi, bien vous devez douloir, Plourer devez votre grevance apperte ; Plurez la mort de cil qui par desserte Amer deviez et par droit de lignaige, Votre loyal noble oncle le trés saige Des Bourgongnons prince et duc excellent ; Car je vous dis, qu’en mainte grant besongne, Encor dires trestuit a cuer dollent Affaire eussions du bon duc de Bourgongne. Pleurez, Berry, et pleurez tuit si hoir, Car cause avez : mort la vous a ouverte ; Duc d’Orliens, moult vous en doit chaloir, Car par son scens mainte faute est couverte ; Duc des Bretons, pleurez, car je suys certe Qu’affaire arés de lui en vo jeune âge ; Pleurez, Flamens, son noble seignourage ; Tout noble sanc, allez vous adoullant ; Pleurez, ses gens, car joie vous eslongne, Dont vous dirés souvent en vous doullant ffaire eussions du bon duc de Bourgongne. Pleurez, Roÿne, et ayez le cuer noir Pour cil par qui feustes au trosne offerte ; Pleurez, dames, sans en joie manoir ; France, pleurez, d’un pillier es déserte, Dont tu reçoys eschec a descouverte, Gar toi du mat quant mort par son outrage Tel chevalier t’a toulu, c’est dommaige ; Pleurez, puepple commun, sans être lent, Car moult perdez et chacun le tesmoingne, Dont vous dires souvent mate et relent : « Affaire eussions du bon duc de Bourgongne. » Princes royaulx, priez par bon tallent Pour le bon duc ; car, sans moult grant parlongne, En vos conssaulx de duc arés tallent, Affaire eussions du bon duc de Bourgongne.