Qu’a vraie amour puissent faire grevance

Faulx mesdisans aront ilz le pouvoir De moi faire mon ami eslongnier ? Nanil, par Dieu ! combien que leur savoir Mettent a moi grever sans espargnier, Mais ja pourtant ne feront recreant Mon cuer d’amer ; a celui le creant Qui l’a du tout, car n’ont pas la puissance Qu’a vraie amour puissent faire grevance. Grever peut bien mon corps ou mon avoir Leur faulx agait, que ne puis engigner, Ou mon honneur, et si puis recepvoir Par eux maint mal ; si le dois ressoigner ; Mais se mon fait devoyent en riant Partout compter en la ville criant, Si n’ai je pas ne doubte n’espérance Qu’a vraie amour puissent faire grevance. Par leurs lengues ou il n’a mot de voir (Je pri a Dieu que l’en leur puist roignier,) Me destournent mon ami a veoir ; De ce les vois assez embesoignier, Et ja par eux vont maintes gens creant Pis qu’il n’y a, et ainsi vont grevant Maint vrai amant ; mais n’ai point de doubtance Qu’a vraie amour puissent faire grevance.