Ballade XXIV (Mon cueur au derrain entrera)

Mon cueur au derrain entrera Ou paradis des amoureux, Autrement tort fait lui sera, Car il a de maux doloreux Plus d’un cent, non pas un ou deux, Pour servir sa belle maîtresse ; Et le tient Dangier, le crueulx, Ou purgatoire de Tristesse. Ainsi l’a tenu, long temps a, Ce faulx traître, vilain, hideux ; Espoir dit que hors le mettra Et que n’en soye jà doubteux. Mais trop y met, dont je me deulx ; Dieu doint qu’il tiengne sa promesse Vers lui, tant est angoisseux Ou purgatoire de Tristesse ! Amour grant aumosne fera, En ce fait cy, d’être piteux, Et bon exemple monstrera À toutes celles et à ceux Qui le servent, quant désireux Le verront, par sa grant humblesse, D’aidier ce pauvre souffreteux Ou purgatoire de Tristesse. Amour ! faites moi si eureux Que mettez mon cueur en liesse : Laissiez Dangier et Deuil tous seulx Ou purgatoire de Tristesse.