Ballade XVI (Ma Dame, vous povez savoir)

Ma Dame, vous povez savoir Les biens qu’ai euz à vous servir ; Car, par ma foi, pour dire voir, Oncques je n’y peuz acquerir Tant seulement un doux plaisir, Que, sitost que je le tenoye, Dangier le me venait tolir Ce peu de plaisir que j’avoye. Je n’en savoye nul avoir Qui peust contenter mon désir, Se non quant vous pouvoye voir, Ma joie, mon seul souvenir. Or m’en a fait Dangier bannir, Tant qu’il faut que loing de vous soye, Parquoy a fait de moi partir Ce peu de plaisir que j’avoye. Non pas peu, car de bon vouloir Content m’en devoye tenir. En esperant de recevoir Un trop plus grant bien advenir ; Je n’y cuidoye point faillir, À la paine que g’y mettoye ; Cela me faisait enrichir Ce peu de plaisir que j’avoye. Belle, je vous vueil requérir, Pensés, quant serés de loisir, Qu’en grant mal, qui trop me guerroye, Est tourné, sans vous en mentir, Ce peu de plaisir que j’avoye.