Chapeaux jolis, violettes et roses

Or soiez liez, jolis et envoisiez, Vrais fins amans, puis que May est venu, Vos gentilz cœurs gaiement esleesciez ; Ne soit de vous nul anuy retenu, Ains soit soulas doucement maintenu, Quant vous voyez resjoïr toutes choses Et qu’en saison sont adès et en cours Chapeaux jolis, violettes et roses, Fleur de printemps, muguet et fleur d’amours. Voiez ces champs et ces arbres proisiez, Et ces beaux prés qui sont vert devenu, Ces oisillons qui tant sont renvoisiez Que par eux est tout doulz glai soustenu ; Tout se revest ; il n’y a arbre nu ; Voiez ces fleurs espanies et closes, Dont bien devez avoir pour les odours Chapeaux jolis, violettes et roses, Fleur de printemps, muguet et fleur d’amours. De doulz pensers vos gentilz cœurs aisiez, Chantez, dancez pour être retenu Avec deduit par qui sont acoisiez Tous desplaisirs, et souvent et menu Riez, jouez, soit bon temps detenu, Amours le veut, pour ce nous a descloses ; Voiez, plaisants, si ayez tous les jours Chapeaux jolis, violettes et roses, Fleur de printemps, muguet et fleur d’amours. Princes d’amours ou bontés sont encloses, Ce mois de May portez les doulces flours, Chapeaux jolis, violettes et roses, Fleur de printemps, muguet et fleur d’amours.