Et certes le doulz m’aime bien

Douce chose est que mariage, Je le puis bien par moi prouver, Voire a qui mary bon et sage A, comme Dieu m’a fait trouver. Louez en soit il qui sauver Le me veuille, car son grant bien De fait je puis bien esprouver, Et certes le doulz m’aime bien. La première nuit du mariage Trés lors poz je bien esprouver Son grant bien, car oncques outrage Ne me fit, dont me deust grever, Mais, ains qu’il fut temps de lever, Cent fois baisa, si com je tien, Sans villennie autre rouver, Et certes le doulz m’aime bien. Et disait, par si doulz langage ; « Dieux m’a fait a vous arriver, Douce amie, et pour votre usage Je crois qu’il me fit eslever. » Ainsi ne fina de resver Toute nuit en si fait maintien Sans autrement soi desriver, Et certes le doulz m’aime bien. Princes, d’amours me fait desver Quant il me dit qu’il est tout mien ; De doulçouir me fera crever, Et certes le doulz m’aime bien.