Puis que partir vous convient

EN plourant a grosses goutes, Trés triste et pleine de dueil, Ma vraie amour dessus toutes, Cil que j’aime, n’autre ne vueil, Vous dis a Dieu a grant peine. Car trop grant doulour soustient Mon cuer, qui grief dueil demaine, Puis que partir vous convient. Or sont mes joies desrouptes ; Plus ne chant, si com je sueil ; Des tristes suivray les routes, J’en ai ja passé le sueil, Puis que je seray longtaine De vous, et il apertient. Je demeure de dueil pleine, Puis que partir vous convient. Je mourrai, n’en faites doubtes, Sans veoir vo doulz accueil. Ha ! Fortune, tu me boutes En dur point, puis que my œil, Fors par pensée prochaine, Ne verront cil qui retient Mon cuer : c’est chose certaine, Puis que partir vous convient.