On doit croire ce que la loi commande

On doit croire ce que la loy commande ; Il est trop folz qui encontre s’opose ; Et s’elle fait a croire, je suppose Que maint devront envers Dieu grant amende. Il est bien voir que naturelement Nous sommes tous enclins et entechiez A tôt pechier ; mais plus orriblement Cheent aucuns en trop plus grant péchiez Qu’autres ne font, et se l’en me demande Quelz gens ce sont, verité dire n’ose Pour leur grandeur, mais Dieux sait toute chose. Et s’il est voir qu’en enfer on descende, On doit croire ce que la loy commande. Merveilles n’est s’on voit communément Au monde moult avenir de meschiefs ; Car trop de maux sont fait couvertement De maint meismes qui sont docteurs et chiefs De doctriner le monde qu’il s’amende, Mais Dieux sait bien quelle pensée enclose Est en leurs cœurs, combien qu’on les alose Pour leur estas ; mais, a quoi que l’en tende, On doit croire ce que la loy commande.