Et a la fois grani joie aporte

Le messagier de Renommée, Qui Pegasus est appellé, Par qui grant parole est semée, Car ce qu’il sait n’est pas cellé, Cil vole plus tôt qu’une aronde, Et telles nouvelles raporte, Souvent qu’il semble que tout fonde, Et a la fois grant joie aporte. Les nouvelles de mainte armée, Ou s’un païs s’est rebellé, Ou s’aucune chose est blasmée, A tantôt dit et revellé ; Mais souvent ment, car il abonde En grant parole droitte et torte ; Par lui sont dolent maint au monde ; Et a la fois grant joie aporte. Celui m’a la guerre nommée, Ou mon ami s’en est alé, Et ma dit qu’une autre enamée A, dont j’ai le cuer adoulé, N’est ne premiere, ne seconde Fois, qu’il ainsi me desconforte ; Dont plourer me fait a grant onde Et a la fois grant joie aporte. Ainsi, en pensée parfonde Songe m’euvre de deuil la porte, Si qu’il m’est vis qu’en pleurs ja fonde ; Et a la fois grant Joie apporte.