Et que jamais leur meschance ne fine

De tous les dieux dont Ovide parole En ses dittiez qui amerent jadis Tant, par amours qui tous les cœurs afole, Qu’ilz en vindrent ça jus de paradis, Soient trestouz les faux amans maudiz. Je pri Pluto, Cerberus, Proserpine, Que grant meschief ne leur soit pas tardis, Et que jamais leur meschance ne fine. Cupido pri le dieux d’amours qui vole, Et Jupiter, Apollo, Palladis, La grant Venus qui d’amours tient escole, Que de leurs cours banis et entredis Soient adès, et tous bien contredis, Et qu’en leurs cœurs mettent d’amours l’espine. Et qu’ilz soient en tous lieux escondis, Et que jamais leur meschance ne fine. Et le dieu Mars qui pas ne porte escole, Cil qui aïde en battaille aux hardis, Veuille sur eux descochier tel bricole, Dont ilz gissent vaincus, maz, estourdis ; L’honneur d’armes soit en eux reffroidis, Et pri Junon la déesse benigne Que povreté et mal leur doint tousdis, Et que jamais leur meschance ne fine. Et s’oultremer s’en vont en ce tendis, Le dieu de mer si trouble la marine Qu’ilz y soient tous peris et laidis, Et que jamais leur meschance ne fine.