Acueil bel et agréable

Douceur, bonté, gentillece, Noblesse, beaulté, grant honnour, Valour, maintien et sagece, Humblece en doulz plaisant atour, Conforteresse en savour, Deuil angoisseux secourable, Acueil bel et agreable. Flour plaisant, de grant haultece Princece, ma prisiée amour, Tour forte, noble fortresse, Largece en honneste séjour, Déesse, estoille, clair jour, Oeil, mirouer aimable, Acueil bel et agreable. Coulour fine, vraie adresse, Tresce blonde, et bonne oudour, Ardour, souesve simplece, Parece sans nulle foulour, Lucrece de simple cremour, Brueil de soulas delictable, Acueil bel et agréable. Maîtresse loyal, ma tenrour, Leesse plaisant, ma doulour, Vueil dire a vous trés louable Acueil bel et agreable.