En traïson, non pas par vacellage

Par envie, qui le monde desroye, Est trayson couvertement nourrie En mains faux cœurs, qui se mettent en voie De mettre a fin leur fausse lecherie, Et en leurs fais usent de tricherie, Dont ilz prenent sur maint grant avantage, En traïson, non pas par vacellage. En grant pouvoir fu la cité de Troye, Un temps qui fu, sur toute seigneurie ; Et la regnoit de ce monde, a grant joie, En haute honneur, fleur de chevalerie ; Qui par Grigois fu puis arse et perie, Et Troyens pris et menez en servage, En traïson, non pas par vacellage. Alixandre qui du monde ot la proie Si fu trahy ; aussi grant desverie Reffist Mordret a Artus par tel voie, Dont maint disent qu’il est en faerie. Le preux Hector, ou ot bonté florie, Ne l’occist pas Achillès par outrage, En traïson, non pas par vacellage. Princes, je dis, nel tenez moquerie, Que l’en se gard de tel forsennerie, Voire qui puet, car on fait maint domage En traïson, non pas par vacellage.