Et si ne puis ne guérir ne mourir

Deuil engoisseux, rage desmesurée, Grief desespoir, plein de forsennement, Langour sans fin, vie maleürée Pleine de plour, d’engoisse et de tourment, Cuer doloreux qui vit obscurement, Tenebreux corps sus le point de perir, Ai, sans cesser, continuellement ; Et si ne puis ne guérir ne mourir. Fierté, durté de joie separée Triste penser, parfont gemissement, Engoisse grant en las cuer enserrée, Courroux amer porté couvertement, Morne maintien sans resjoïssement, Espoir dolent qui tous biens fait tarir, Si sont en moi, sans partir nullement ; Et si ne puis ne guérir ne mourir. Soussi, anuy qui tous jours a durée, Âpre veillier, tressaillir en dorment, Labour en vain, a chère alangourée En grief travail infortunéement, Et tout le mal, qu’on puet entièrement Dire et penser sans espoir de guérir, Me tourmentent desmesuréement ; Et si ne puis ne guérir ne mourir. Princes, priez a Dieu que bien briefment Me doint la mort, s’autrement secourir Ne veut le mal ou languis durement ; Et si ne puis ne guérir ne mourir.