De moi laissier ainsi pour autre amer

Ha ! mon ami, que j’ai long temps aimé ! Comment as tu le cuer si desloiaulx, Que moi qui t’ai si doucement clamé Ami long temps, tu me fais tant de maux ? Parjur, mauvais, plein de mençonge et faux, On te devroit par dessus tous clamer, De moi laissier ainsi pour autre amer. Je t’avais dessus tous affermé Pour mon ami sur tous especiaulx, Et tous jours t’ai chery et reclamé De tout mon cuer qui t’a été loyaulz ; Mais plus mauvais n’a n’en France n’en Caulx, Ne autre part, le cuer as trop amer De moi laissier ainsi pour autre amer. Est donc ton cuer si pris et enflammé De celle qui tant me fait de travaulx, Que de s’amour soies si affamé Que de moi fais contre elle petit taux ? Tu t’avances de ce faire a bas saulx, Ce m’est avis, et te doit on blâmer De moi laissier ainsi pour autre amer.