Ce jour de May gracieux plain de joie

Qui est celluy qui ne sent la pointure Aucunement d’amours, qui point ne blesce, Ou mois de May jolis, plain de verdure ? Si ne crois pas, Prince de grant noblesce, Haut et puissant, que vraie amour ne drece Vos nobles faits en toute bonne voie ; Et pour ce a vous ma ballade s’adresce, Ce jour de May gracieux plain de joie. Car je vous vois plus qu’autre creature Reampli de biens et haute gentillesce ; Pour ce je tiens que vous en tout temps dure Doux souvenir, qui departir ne laisse Loyal amour de vous, et que maistresce Avez plaisant et belle, en qui s’employe Vo noble cuer, qu’elle tient sans tristesce, Ce jour de May gracieux plain de joie. Si affiert bien que mettés temps et cure D’amours servir, qui de sa grant richesce Guerredonner vous puet de nourriture Douce, plaisant, et qui fait en prouesce Les bons monter, et que vo cuer s’eslesse En ce doux temps, qui aux amans envoie Plaisant pensser et cuer tient en leesse Ce jour de May gracieux plain de joie. Prince amoureux, doux, humain, sans hautece De nul orgueil, par moi Amours vous proie Que gai soyez pour vo douce déesse, Ce jour de May gracieux plain de joie.